ઓશોની દ્રષ્ટીએ આપવું એ જ સાચી પ્રાર્થના

ઈશ્વર સદાયે વધુ ને વધુ આપતા રહે છે. તે આપે છે કારણ તે આપ્યા વગર રહી શકતા નથી, કારણ તેમની પાસે અઢળક છે. એ સૂર્ય જેમ પ્રકાશ આપે છે અને ફૂલો જેમ ખુશ્બુ આપે છે એ રીતે આપે છે - આપવું તેમનો સહજ સ્વભાવ છે. આ સમજાઈ જાય તે દિવસથી મનુષ્ય ઈશ્વર નજીક પહોંચવાનું શરૂ કરી દે છે. એ પણ આપતા શિખી જાય છે અને આ ઈશ્વર પાસે પહોંચવાનો સૌથી ટૂંકો માર્ગ છે.

મનુષ્ય સંગ્રહખોર છે. આજ તેની અને ઈશ્વર વચ્ચેનો વિરોધાભાસ છે. માણસ કંજૂસ છે. એ ક્યારેક કંઈક આપે પણ છે તો તેની પાછળ પરત મેળવવાની આશા હોય છે, વધુ ને વધુ પાછું મેળવવાની અપેક્ષા હોય છે. એ હંમેશા પોતાના ફાયદા વિશે જ વિચારતો હોય છે.આપવું એ તેના માટે આનંદની ઘટના નથી, તેની જરૂરિયાત છે.એનું આપવું વેપાર હોય છે,પ્રેમ નહિ, એમાં વહેંચવાની ભાવના હોતી નથી.આ દુન્યવી માણસનો સ્વભાવ છે, તેની આપવાની વ્યાખ્યા છે.

આધ્યાત્મિક મનુષ્ય કોણ છે? સાચો આધ્યાત્મિક મનુષ્ય એ છે જે આપવાનું જાણે છે, જે કશી જ અપેક્ષા વગર આપે છે, જે કોઈ પણ પ્રકારના ભેદભાવ વગર આપે છે, જે એમ નથી કહેતો ' તું સારો કે સારી છે એટલે હું તને આપું છું અને તુ ખરાબ છે એટલે હું તને આપતો નથી'. જો તમે આપવામાં ભેદભાવ કરશો તો એનો અર્થ એ આપવામાં વેપારની ભાવના પ્રવેશી. ભગવાન સાધુ કે શેતાન બધાંને સરખું આપે છે. તે જ્યારે વરસાદ વરસાવે છે ત્યારે માત્ર સારા પર જ વરસાવે તેવું બનતું નથી. સૂર્ય જ્યારે ઉગે ત્યારે તે માત્ર સદગુણીઓ ને જ પ્રકાશ આપતો નથી, બધાંને એક સમાન અજવાળું આપે છે.

વહેંચવાની એ આદત ને તમારો બીજો સ્વભાવ બની જવા દો, એને તમારી જીવનશૈલી બની જવા દો. એને હું પ્રાર્થના ગણું છું. એ જ સૌથી મહત્વની પ્રાર્થના છે : કંઈજ પાછું મેળવવાની અપેક્ષા વગર આપવાની સમર્થતા, કોઈ જ પ્રકારની શરતો વગર આપવાની સમર્થતા, તમારી પાસે જે પુષ્કળ છે તેમાંથી આપવાની સમર્થતા...

-        -   ઓશો

('ઈન્ટરનેટ પરથી')

પાસવર્ડે જીવન બદલી નાખ્યું

એક સરસ મજાની સવારે ઓફિસ પહોંચી મેં મારું કોમ્પ્યુટર ઓન કર્યું ત્યાં જ સામે મેસેજ આવ્યો "તમારો પાસવર્ડ એક્સપાયર થઈ ચૂક્યો છે." ઓફિસમાં સુરક્ષા પોલીસીને ધ્યાનમાં લઈ અમારે દર મહિને પોતપોતાના કોમ્પ્યુટર નો પાસવર્ડ ચેન્જ કરવો પડે છે. મારા થોડા જ સમય પહેલા થયેલા છૂટાછેડા ને લીધે હું ઘણો વ્યથિત હતો. તેણે - મારી પત્નીએ મારી સાથે જે કર્યું એ તે કઈ રીતે કરી જ શકે એવા વિચારો મને સતત સતાવતા હતા.

પાસવર્ડ બદલતી વખતે મારા બોસે મને એ અંગે આપેલી ટીપ મને યાદ આવી. તેમણે કહેલું,"હું એવો પાસવર્ડ રાખીશ  જે મારું જીવન બદલી નાખે." મારી વર્તમાન  મન:સ્થિતી એવી હતી કે હું કોઇ પણ એક કામ પુરું કરવા તેના પર ધ્યાન કેન્દ્રીત કરી શકતો નહોતો. આ પાસવર્ડ વાળી બીનાએ મને વિચાર કરવા પ્રેર્યો કે મારે મારા છૂટાછેડાની ઘટનાને મારા પર હાવી થવા દેવી જોઇએ નહિ અને મારે પરિસ્થિતી બદલવા થોડા મજબૂત મનોબળ સાથે ચોક્કસ કંઈક કરવું જોઇએ.

મેં મારો પાસવર્ડ રાખ્યો 'Forgive@her'. હવે દિવસમાં ઘણી વાર જ્યારે મારું કોમ્પ્યુટર લોક થઈ જાય ત્યારે તે અનલોક કરવા મારે મારો આ નવો પાસવર્ડ ટાઈપ કરવો પડતો. રોજ જમ્યા પછી કામ પર પાછો ફરું, બ્રેક બાદ કોમ્પ્યુટર પર કામ ફરી શરૂ કરું ત્યારે મારી પત્નીને  હું માફ કરતો. આ એક સરળ પગલાએ મારો ભૂતપૂર્વ પત્ની તરફ જોવાનો દ્રષ્ટીકોણ બદલી નાખ્યો. ક્ષમાભર્યા એ નાનકડા પાસવર્ડ સંદેશાએ મને જે બીનાઓ બની હતી તેનો સ્વીકાર કરતા શિખવ્યું અને મને હતાશાની એ ઉંડી ખીણમાંથી બહાર કાઢ્યો જેમાં હું સરકી ગયો હતો. એ પછીના મહિને જ્યારે પાસવર્ડ બદલવાનો વારો આવ્યો ત્યાં સુધી હું હળવોફૂલ થઈ ગયો હતો, મુક્ત થઈ ગયો હતો.

એ પછીના મહિના માટેનો મારો નવો પાસવર્ડ હતો 'Quit@smoking4ever' આ વખતે મને ધૂમ્રપાન છોડી દેવાના લક્ષ્યને સિદ્ધ કરવાની પ્રેરણા મળી અને હું એ બદીમાંથી મારી જાતને મુક્ત કરી શક્યો.

એક મહિના પછી મારો પાસવર્ડ હતો 'Save4trip@europe' અને ત્રણ મહિનામાં હું યુરોપની મુલાકાતે જઈ આવ્યો.

આ નાનકડા રીમાઈન્ડર્સે મને મોટા મોટા લક્ષ્યાંકો હાંસલ કરવામાટે સતત પ્રેર્યો, ઉત્સાહીત કર્યો અને એમાં સફળતા અપાવી.

કેટલીક વાર તમારા ધ્યેયો સિદ્ધ કરવાનું કામ અઘરું બની જતું હોય છે પણ આ રીતે તેમને સતત યાદ રાખતા રહેવાથી અસરકારક પરીણામ મળે છે.

હવે પછીનો મારો પાસવર્ડ છે 'Lifeis#beauTful' ... અને મને વિશ્વાસ છે મારું જીવન ટૂંક સમયમાં બદલાઈ જવાનું છે...

રીડર્સ ડાઇજેસ્ટમાં છપાયેલ આ એક સત્ય ઘટના છે.

('ઈન્ટરનેટ પરથી')

સદાયે જુવાન રહો

જ્યાં સુધી અહિ દર્શાવેલી ટીપ્સ તમારા જહનમાં ન ઉતરી જાય ત્યાં સુધી એ વાંચ્યા કરો!

૧.  માત્ર ઉત્સાહી હોય એવા જ મિત્રો રાખો

સોગિયા ઉદાસીન મિત્રો તમને પણ નીચા લાવે છે.(તમે પોતે પણ જો સોગિયા કે ઉદાસીન હોવ તો આ યાદ રાખો!)

ર. મળતી દરેક તકે તમારા સ્નેહી જનોને જણાવવાનું ચૂકશો નહિ કે તમે એમને કેટલું ચાહો છો.

3. શિખતા રહો. કોમ્પ્યુટર વિશે, કલા વિશે, બાગકામ વિશે કે પછી ગમે તે નવા વિષય પર શિખતા રહો. તમારા મગજને ક્યારેય નવરું પડવા દેશો નહિ. પેલી કહેવત યાદ છે ને 'ખાલી દિમાગ શેતાન કા ઘર!' એ શેતાનનું જ એક સ્વરૂપ અલ્ઝમીર (ઘડપણ માં ભૂલી જવાનો રોગ) છે.

૪. સરળ વસ્તુઓ માણો. 

૫. વારંવાર, મોટેથી અને લાંબુ હસો! હસતા હસતા પેટમાં ના દુખે ત્યાં સુધી હસો! જો તમારો કોઇ મિત્ર તમને હસાવી જાણતો હોય તો તેની સાથે વધુમાં વધુ સમય પસાર કરો.

૬. આંસુઓ વહેવા દો સહનશીલ બનો, રડો અને પછી આગળ વધો! જીવનભર તમારી સાથે રહેવાની હોય એવી એક માત્ર વ્યક્તિ તમે પોતે છો.આથી જ્યાં સુધી જીવંત હોવ ત્યાં સુધી મોજ થી જીવો, જીવન માણો.

૭. તમને વ્હાલી વસ્તુઓથી સદાયે ઘેરાયેલા રહો. પછી ભલે એ કુટુંબ હોય, પાળેલા પ્રાણીઓ હોય, તમને મળેલી ભેટો હોય, સંગીત હોય, ઝાડ-છોડ હોય, તમારા શોખ હોય કે પછી તમને ગમતી કોઇ પણ ચીજ-વસ્તુ હોય. તમારું ઘર તમારું શરણું છે!

૮. તમારા આરોગ્ય ને માણો. જો તમારું આરોગ્ય સારું હોય તો એને જાળવી રાખો. જો એ અસ્થિર હોય તો તેને સુધારો. જો એ તમારા તાબાની બહાર હોય તો મદદ લેતા ન અચકાઓ.

૯. પસ્તાવાના ઝરણામાં ડૂબકીઓ ન લગાવો. મોલમાં જાવ, વિદેશ જાવ પણ પસ્તાવાની ગલીની મુલાકાતે ન જાવ.

૧૦.  દરેક વસ્તુ બે વાર કરો.

એક સ્ત્રીએ એવી ઇચ્છા પ્રગટ કરી કે તેના કબરના પથ્થર પર આ પ્રકારનું લખાણ કોતરેલું હોય :

"દરેક વસ્તુ બે વાર અનુભવી.અને બંને વાર તેની સરખી મજા  માણી!"

૧૧. જેમણે તમને રડાવ્યા હોય તેમને તત્ક્ષણ માફ કરી દો.કદાચ તમને એમ કરવાનો બીજો મોકો નહિ મળે.

 ...અને જો તમે આ લેખ બીજા ચાર જણને નહિ વંચાવો તો....તો અહિ કોને પડી છે??!!

યાદ રાખો વિતેલો સમય ક્યારેય ફરી પાછો નથી આવતો.  તમે જેને જેને મળો છો એ બધા સાથે જરૂરી હોય એ કરતા પણ વધુ ઉદારતાથી વર્તો કારણ દરેક જણ પોતપોતાની અંગત લડાઈ લડી રહ્યું હોય છે.

('ઈન્ટરનેટ પરથી')

મારા જીવનમાં મહિલાઓનું મહત્વ

જ્યારે હું જન્મ્યો હતો ત્યારે એક સ્ત્રીએ મને તેડ્યો હતો અને તેણે મને મોટો કર્યો : મારી મા

હું બાળકમાંથી કિશોર અને યુવાન બન્યો તે દરમ્યાન એક સ્ત્રીએ મારી કાળજી રાખી અને તે મારી શ્રેષ્ઠ મિત્ર બની મારી સાથે રમી અને મોટી થઈ : મારી બહેન

હું શાળા અને કોલેજમાં ગયો ત્યારે ત્યાં એક સ્ત્રી હતી જેણે મને ભણાવ્યો-ગણાવ્યો : શિક્ષિકા

જ્યારે મને જીવનમાં કોઈના સહકાર-સથવારની જરૂર પડી,પ્રેમની જરૂર પડી ત્યારે એક સ્ત્રી સદાયે મારી સાથે રહી : મારી પત્ની

 હું જ્યારે કઠણ હતો ત્યારે એક સ્ત્રીએ  મને પિગળાવ્યો : મારી દિકરી

જ્યારે હું મરણ પામીશ ત્યારે એક સ્ત્રી જ મને પોતાનામાં સમાવી લેશે : મારી માતૃભૂમિ

હું એક પુરુષ છું અને મને મારા જીવનમાં આ બધી સ્ત્રીઓનો સાથ મળ્યાનું ગૌરવ છે...તેમના વગર હું શું હોત? ક્યાં હોત?  હોત ખરો જે કંઈ પણ છું?

૮મી માર્ચને દિવસે ઉજવાતા “વિશ્વ મહિલા દિવસ” નિમિત્તની દરેક સ્ત્રીઓને  અઢળક શુભેચ્છાઓ!

('ઈન્ટરનેટ પરથી')