'ઇન્ટરનેટ કોર્નર'નાં દસ વર્ષની સફર...

પ્રિય વાચકમિત્રો,

                જોતજોતામાં આજે 'ઇન્ટરનેટ કોર્નર'ને દસ વર્ષ પૂરાં થઈ ગયાં! ઇન્ટરનેટ મહાસાગર સમાન છે અને તેમાંથી સરસ મજાની વાતોરૂપી મોતી શોધી કાઢી તમારાં સૌ સાથે એ માણતાં માણતાં ક્યારેય એક આખો દસકો પૂરો થઈ ગયો તેની ખબર જ ન પડી!

                આ કટાર પર આધારીત પાંચ પુસ્તકો કથાકોર્નર,મહેક,કરંડિયો,આભૂષણ અને ઝરૂખોની ચાર આવૃત્તિઓ પ્રકાશિત થઈ ચૂકી છે એ તમારાં પ્રેમ અને શુભાશિષ વગર શક્ય ન બન્યું હોત  અને હવે આ શ્રેણી પર આધારીત ત્રણ નવા પુસ્તકો પણ તૈયાર થઈ રહ્યાં છે તેનાં નામો શું રાખવા એ નક્કી કરવામાં તમારાં સૌ પાસેથી મદદની અપેક્ષા રાખું છું.મને એ ઇમેલ અથવા મોબાઈલ પર જણાવશો તો તમારો આભારી રહીશ. તમારા મૂલ્યવાન પ્રતિભાવોનો ધોધ પણ વહાવ્યે રાખજો એમાં ડૂબકી મારીને હું પ્રેરણા પામતો રહું છું વધુ સારા લેખો લખવા માટે!

                સારા વિચારો ઇશ્વર આપણને સૌને આપતાં રહે અને એનો ફેલાવો આપણે કરતાં રહી આપણું અને આસપાસનાં સૌનું જીવન સુંદર અને સુખાકારી બનાવતા રહીએ એવી અભ્યર્થના...

આભાર!                                                 

- વિકાસ ઘનશ્યામ નાયક

ઘણાં વર્ષો પહેલાં હાથ હલાવી કરેલું અભિવાદન

              દવાની દુકાનેથી જ્યારે હું પૈસા ચૂકવી મારી દવાઓ લઈ પાછી ફરવા જતી હતી ત્યારે યુવાન કેશિયરે મને પૂછ્યું,"તમે શ્રીમતી સદગુણા મહેતા જ ને?" ઉત્સાહ અને ઉત્સુકતા ભર્યાં સ્મિત સાથે મેં હકારમાં માથું ધૂણાવ્યું. તેણે પૂછ્યું,"શું હું તમને યાદ છું?" તેના શર્ટ પર તેના નામની પટ્ટી ચોડેલી હતી તેના પરથી વાંચીને મેં કહ્યું,"વિનય." અને એ સાંભળી તે યુવાનનો ચહેરો એવાં સ્મિતથી શોભી ઉઠ્યો કે મારે તેને સાચું કહી દેવું પડ્યું કે મેં તેને ઓળખ્યો નથી.

                તેણે કહ્યું કે તે જ્યારે પાંચ વર્ષનો હતો ત્યારે તે સ્કૂલે જતી બસમાં મારી દિકરી સાથે એક જ સીટ પર બેસતો. તેણે આગળ જણાવ્યું, "તમે એકમાત્ર એવી વ્યક્તિ હતાં જેમણે મારી સામે હંમેશા હાથ હલાવી મારૂં અભિવાદન કર્યું હતું."

                આ સાંભળતાં જ મારૂં હ્રદય ભરાઈ આવ્યું અને લીલી છમ્મ લાગણીથી ભીંજાઈ ગયું.

                મને વિચાર આવ્યો કે તેના બાળપણમાં તે એકલતાની કેટલી વેદના અનુભવતો હશે કે મેં હાથ હલાવી કરેલું સાવ સામાન્ય અભિવાદન તેને આટલાં વર્ષો સુધી યાદ રહ્યું હશે. મારી સાવ ક્ષુલ્લક લાગતી ચેષ્ટાએ તેના જીવનમાં કેટલો અગત્યનો ભાગ ભજવી તેને કેટલી ખુશી આપી હશે કે એ આટલાં વર્ષો બાદ પણ મને મારા નામથી બોલાવી રહ્યો હતો!

                હું ખૂબ ખૂબ ખુશ થઈ ગઈ અને મને કોઈ તરફથી મળેલી આ સર્વોત્તમ ભેટ હતી.

 ('ઈન્ટરનેટ પરથી')

********************************************

'ઇન્ટરનેટ કોર્નર'નાં દસ વર્ષની સફર...

પ્રિય વાચકમિત્રો,

                જોતજોતામાં આજે 'ઇન્ટરનેટ કોર્નર'ને દસ વર્ષ પૂરાં થઈ ગયાં! ઇન્ટરનેટ મહાસાગર સમાન છે અને તેમાંથી સરસ મજાની વાતોરૂપી મોતી શોધી કાઢી તમારાં સૌ સાથે એ માણતાં માણતાં ક્યારેય એક આખો દસકો પૂરો થઈ ગયો તેની ખબર જ ન પડી!

                આ કટાર પર આધારીત પાંચ પુસ્તકો કથાકોર્નર,મહેક,કરંડિયો,આભૂષણ અને ઝરૂખોની ચાર આવૃત્તિઓ પ્રકાશિત થઈ ચૂકી છે એ તમારાં પ્રેમ અને શુભાશિષ વગર શક્ય ન બન્યું હોત  અને હવે આ શ્રેણી પર આધારીત ત્રણ નવા પુસ્તકો પણ તૈયાર થઈ રહ્યાં છે તેનાં નામો શું રાખવા એ નક્કી કરવામાં તમારાં સૌ પાસેથી મદદની અપેક્ષા રાખું છું.મને એ ઇમેલ અથવા મોબાઈલ પર જણાવશો તો તમારો આભારી રહીશ. તમારા મૂલ્યવાન પ્રતિભાવોનો ધોધ પણ વહાવ્યે રાખજો એમાં ડૂબકી મારીને હું પ્રેરણા પામતો રહું છું વધુ સારા લેખો લખવા માટે!

                સારા વિચારો ઇશ્વર આપણને સૌને આપતાં રહે અને એનો ફેલાવો આપણે કરતાં રહી આપણું અને આસપાસનાં સૌનું જીવન સુંદર અને સુખાકારી બનાવતા રહીએ એવી અભ્યર્થના...

આભાર!                                                 

- વિકાસ ઘનશ્યામ નાયક

પ્રેમનો એકરાર પોતપોતાની ભાષામાં...

જુદા જુદા રોજગારમાં રોકાયેલ  કે પછી કોઈ ખાસ લાક્ષણિકતા ધરાવતી  વ્યક્તિ પોતાના પ્રેમનો એકરાર પોતાની ભાષામાં કેવી રીતે વ્યક્ત કરે છે :

 સુથાર

 છોલવું કારણ વિના એ એમની લત હોય છે

પ્રેમનો રંધો નવો ને રોજ કસરત હોય છે

છે ટકાઉ સાગ જેવું દિલ છતાં વ્હેરાય છે

એમની પાસે નજરની એક કરવત હોય છે

લુહાર

ઘણની સાથે કોની જોડી હોય છે ?

લાગણી ટીપી ને તોડી હોય છે

બેવફા તારા હૃદયની એરણે –

રોજ બદલાતી હથોડી હોય છે !

ટપાલી

તારી ગલીમાં જાતને વેચ્યા કરું છું હું

તારા પ્રણયના બોજને ખેંચ્યા કરું છું હું

કોની કૃપાથી હું ઘસું છું તારા ઉંબરા ?

પત્રો લખે છે કોક ને વહેંચ્યા કરું છું હું !

ટાલ ધરાવનાર

હું ઘસાયો એકલો ને તું સદા વ્હેતી ગઈ

‘લ્યો લપસજો’ કહીને લીસ્સા ઢાળ તું દેતી ગઈ

તેં દિધેલો કાંસકો ઝાલીને હું બેસી રહ્યો

બેવફા તું મસ્તકેથી વાળ પણ લેતી ગઈ !

સેલ્સમેન

સાવ રીઝનેબલ અમારા રેટ છે

પ્રેમપત્રોનું અસલ પેકેટ છે

હર સિઝનમાં ચાલતી પ્રોડક્ટ આ –

વાપરો તો દિલ મફતમાં ભેટ છે.

  પાયલોટ

રન-વે પ્રણયનો વ્યસ્ત છે, પ્લેનો હજાર છે

તારી નજરનો જોકે જુદેરો પ્રકાર છે

જગ્યા તો તરત થઈ જશે, તું લેન્ડ કરી જો

સિગ્નલ સતત ઝીલે છે, હૃદયનું રડાર છે.

દરજી

ગાજ-ટાંકામાં નવું શું ? રોજ એ કરતો રહું ?

પ્રેમનો ગ્રાહક મળે તો રોજ છેતરતો રહું

આમ તો કાતર જૂની છે, તોય રઘવાયી રહે

પારકા તાકા મળે તો રોજ વેતરતો રહું !

પોલીસ

હથકડી હૈયાની નહીં તૂટી શકે !

મુજ વિના કોઈ નહીં લૂંટી શકે !

તું ભલે ઝડપાઈ મારા પ્રેમમાં –

પણ વગર હપ્તે નહીં છૂટી શકે !

ઈંગ્લીશ બોલતો ગુજરાતી

ફિલ્ડ છે લવનું ડીયર, તું ફલર્ટ કર ને ફ્લાય કર

તન થયું ટાયર્ડ, તો તું મનને મેગ્નીફાય કર

પ્રેમમાં ઈનફેક્ટ, યુ સી, ન્હોય પરમેનન્ટ કૈં

તુંય થા બીઝી ગમે ત્યાં, ને ગમે ત્યાં ટ્રાય કર !

દૂરદર્શનનો ઉદ્દઘોષક

પ્રેમનું આ છે પ્રસારણ દિલની ચેનલ વન ઉપર

હે પ્રિયે ચેનલ બદલ ના વાત લેજે મન ઉપર

ખેંચ ના સિરિયલ હવે સંબંધની દર્શને

એક એપિસોડ તો કર પાસના દર્શન ઉપર

ક્રિકેટર

છે પ્રિયે લિમિટેડ ઓવર્સ, ને પ્રણયની ખેંચ છે

ડેડ-પીચ પર ચાલતી આ એક વન-ડે મેચ છે

થર્ડ અમ્પાયરને વચમાં નાંખ ના, આ પ્રેમ છે

આપણો સંબંધ શું છૂટી ગયેલો કેચ છે ?

               

('ઈન્ટરનેટ પરથી')